BuyBust: Protestang Pelikula


Sa pagpadagos kang madugo buda kontrobersyal na gyera kontra droga ni Presidente Rodrigo Roa Duterte, dae mapupugulan ang pagluwas kang mga protestang pelikula. Lampas duwang taong puon kang magtukaw si Duterte bilang payo kang estado, nagkaigwa kitang “BuyBust” ni Erik Matti, direktor man kang “On the Job” (2013) buda ang horror na “Seklusyon” (2016) na pareho man igwang social commentaries.

[Ang ribyung ini ay igwang minor spoilers kang inot na treinta minutos kang pelikula, pero hanggang mapu-pwede, bawas ang dakulang spoilers. Pwede niyo ining basahon na mae-enjoy niyo pa man guiraray ang twists and turns kang pelikula.]




 

Ang istorya kang “BuyBust” minaikot kay Nina Manigan (Anne Curtis), na depende sa persepsyon mo, maswerte o de malas: Siya sana ang nabuhay sa squad na hinalian niya pakatapos kang sarong operasyon kontra droga por dahil sa sarong “Hudas” na dae niya pa naaaraman kung sisay​​.

Pakatapos maubos ang kaiba ni Manigan sa squad, tinanggap siya ni Bernie Lacson (Victor Neri) sa squad niya na napiling maguibo kang operasyon sa Rajah Sulayman para dakupon si Biggie Chen (Arjo Atayde), sarong bigtime na drug lord. Nung maglipat ang operasyon hali sa Rajah Sulayman paduman sa Gracia Ni Maria, ang mga paradakop, sinda naman ang tigdadakop—kang mga durugista buda kang mga lokal na residente, na pagal nang maging biktima kang mga balyuhan ki bala sa lugar ninda.




Nagpuon ang pelikula sa interugasyon ni Detective Alvarez (Nonie Buencamino) buda ni Detective Dela Cruz (Lao Rodriguez) kay Teban (Alex Calleja), sarong drug dealer na nagsabing aram niya kung pano “mapapaluwas sa lungga niya” si Biggie Chen. Sa puon pa lang kang pelikula, mahihiling mo na sa diit na segundo ang ritrato ni Duterte sa pader. Digdi pa lang, aram mo nang ang pelikulang ini, naka-set sa presenteng panahon. Aram ni Matti kung sain buda kung nuarin niya itututok ang kamera sa mga elemento sa screen.

Nung sinabi ni Teban kina Alvarez buda Dela Cruz na si Biggie Chen nasa Tondo, sarong lugar na sabi kang Philippine Drug Enforcement Agency (PDEA) na drug-free na, ikinangalas ini kang duwang detective ta si Dela Cruz daa mismo ang nagpasigurado na wara nang droga sa lugar.

Piot ang mga aguihan sa Gracia Ni Maria kung sain wara kang mahihiling na harong na konkreto ang materyales. Sa samok kang Gracia, garu na man sarong karakter ining lugar sa istorya. Sa sarong liko, may sarong pamilya na nagmumundo pa sana sa pagkagadan kang saro sa saindang mga aki na biktima man kang baralyuhan ki bala sa gyera kontra droga. Sa paagui kang mga residenteng yaon sa Gracia, pinahiling ni Erik Matti ang sitwasyon kang mga tawong tig-aapod na “collateral damage”: sindang daeng maguinibo maski dagit buda takot magtabang o magpili ki kampong tatabangan.





​​
Sa bandang hudyan kang pelikula, igwang diperensya sa na-report na bilang kang mga nagadan kontra sa bilang kang totoong fatality. Ini, garu komentaryo ni Matti sa nangyayari sa tunay na buhay.

Mahiro ang kamera na ginamit ni Matti sa mga scene na may labanan, posible huli tanganing itago ang mga sala sa mga choreography kang hand-to-hand combat kang mga bida buda kang mga durugista kang Gracia. Pero dae kaini nahinaan ang kusog kang mensahe na muyang ipadara ni Matti sa pelikula niya. Sa kadaklan kang mga scene na labanan, halos dae na aram kang mga agent kang PDEA—buda kang mga parahiling sa sine—kung sisay ang residente sanang dagit buda sisay ang durugistang kalaban. Sina Manigan buda ang mga kaiba niya, sa saindang kamuyahan na makaluwas sa Gracia, dae din nakakaiwas na manglaban sa mga resident buda durugista.

[BASAHON ANG RIBYU MI KANG HORROR NA “A QUIET PLACE”]

Pinatibay din kang musikang guinibo nina Erwin Romulo, na kaiba rin ni Matti sa “On the Job,” buda ni Malek Lopez ang pag-istorya kang mga pangyayari sa Gracia.

Maabot pa hanggang sa katapusan kang pelikula bago ni Matti buda kang saiyang kaiba sa pagsurat kang istorya na si Anton C. Santamaria ang saro pang muya nindang ipahiwatig—na sa gabos na nangyari, igwang mga tawong nagkakaigwang kwarta maski harayo sinda sa delikadong sitwasyon kang operasyon—sa paagui kang halipot pero malaman na speech ni Biggie Chen na garu man sana delayed na Greek chorus kang pelikula.




Inatake ni Matti ang istorya na garu na ini pelikula ni Quentin Tarantino. Mas madugo kesa sa maski anong labanan sa On the Job  ang naging karambola sa Gracia. May mga labanan na dae ka makukumbinsi kang choreography o kang acting (siguro huli ta dipisil ang choreography sa piot na lugar), pero makaskas man ining natatabunan ki ibang aksyon.

Sa kabuuan, nakaguibo si Matti ki saro na namang istoryang dipisil irayo sa presenteng mga nangyayari sa bansa lalo nang midbid siya na saro sa mga kritiko kang gyera kontra droga.

Show us some love and retweet this story:

Pwede kamo magpadara samuya ki mga istorya, rawit-dawit, ritrato, buda mga kurit. Pwede niyo samuya ipadara sa ibaliostorytellers@gmail.com, o sa Twitter sa @ibaliostories, or sa Facebook.
You may submit your stories, poems, photos, and illustrations to Ibalio Stories via email (ibaliostories@gmail.com; ibaliostorytellers@gmail.com), Twitter (@ibaliostories), or Facebook (@ibaliostories).



​​

Please follow and like us:
0

Leave a Reply

Your email address will not be published. Required fields are marked *